Joriy yilning 4 yanvar kuni Andijon viloyati Shahrixon tumanida Lacetti haydovchisi tomonidan qoidabuzarlik sodir etilgan. Lacetti haydovchisi yo‘lda YPX xodimining qonuniy talablariga bo‘ysunmasdan to‘xtamay kelgan. Bu haqda "Zamon" axborot dasturida xabar qilindi.

Ikkinchi YPX xodimi ushbu mashinani to‘xtatish choralarini ko‘rib to‘xtatganida, haydovchi mashinaning hech qanday hujjatlari yo‘qligini aytib, «mashina o‘g‘irlangan» deb YPX xodimiga do‘q urib, uning yoqasiga yopishgan.

Haydovchi YPX xodimining bodikamerasini yulib olib, mashinasida ketib qolishga uringan. YPX xodimi esa uning mashinasiga o‘tirib olib, yordamchi kuchlar yetib kelganidan so‘ng mashinani jarima maydonchasiga olib borgan.

Ushbu holat bo‘yicha Lacetti haydovchisi Ma’muriy javobgarlik to‘g‘risidagi kodeksning 126-moddasi 1-qismi, 135-modda 1-qismi, 183-modda va 194-moddalarning 1-qismlari bo‘yicha huquqbuzarlik sodir etganlikda aybdor deb topilib, 5 million 575 ming so‘m miqdorida jarimaga tortilgan.