Davlat statistika qo‘mitasi 2020 yilning aprel oyida iste’mol sektoridagi inflyasiya darajasini e’lon qildi.
2020 yilning aprelida iste’mol narxlari va tariflarining oy davomidagi o‘rtacha o‘sishi sur’ati 1,7 % ni tashkil etdi. 2020 yilning yanvar-aprel oylari davomida iste’mol bozoridagi narxlar va tariflar o‘rtacha 4,5 % ga ko‘tarildi.
Yillik davrda esa (2019-yilning apreliga nisbatan) tovarlar va xizmatlar narxlarining o‘rtacha o‘sish sur’ati 14,5 % ni tashkil etdi.
Inflyasiya darajasi oshishining asosiy hissasi oziq-ovqat mahsulotlari narxi oshishi bilan bog‘liq. Aprel oyida oziq-ovqat mahsulotlari narxlari 3,3 foizga ortgan. Shu bilan birga nooziq-ovqat mahsulotlari narxlari 0,7 %ga, xizmatlar narxlari esa 0,3 %ga qimmatlagan.
Umumiy hisobda, 2020 yilning to‘rt oyi davomida oziq-ovqat mahsulotlari narxlari darajasi 7,7 %, nooziq-ovqat mahsulotlar 2,4 %, xizmatlar 1,8 % ga oshdi.