Jon Xopkins universiteti ma’lumotlariga ko‘ra, AQSh Covid -19 koronavirusi bilan zararlangan soni bo‘yicha uchinchi o‘ringa chiqib oldi. U yerda virusni yuqtirib olganlar soni 26 138 nafarga yetdi.
Bemorlarning katta qismi Nyu-York shtatiga to‘g‘ri keladi — 12,3 ming kishi. Keyingi o‘rinlarda Vashington (1793 ta) hamda Kaliforniya (1407 ta) shtatlari turibdi.
Qo‘shma Shtatlarda virus 323 nafar bemorning hayotiga zomin bo‘ldi. Vashingtonda 94 kishi, Nyu-Yorkda 75 bemor hamda Kaliforniyada 25 kishi koronavirusdan vafot etdi.
Jami 176 nafar bemor butunlay sog‘ayib ketgan. Covid-19 mamlakatning barcha shtatlarida qayd etilgan.
16 mart holatiga ko‘ra, AQShda 3,5 mingta koronavirus holati aniqlangan edi, 6 kun ichida bemorlar soni 7 barobarga ko‘paydi.