AQSh prezidenti Jo Bayden ma’muriyati Kubadagi Guantanamo harbiy bazasining qamoqxonasini yopmoqchi. «Bu haqda Oq uyning matbuot kotibi Jen Psaki ma’lumot berdi», deyiladi “CNN” xabarida.
Baydenning prezidentlik davrida mazkur qamoqxona yopiladimi, degan savolga Psaki: «Bu bizning pirovard maqsadimiz», deb javob berdi. AQSh mudofaa vazirligi vakili Jon Kibrining aytishicha, mahkama rahbari Lloyd Ostin mazkur ob’yektning yopilishini qo‘llab-quvvatlaydi. “Reuters«ning manbasiga ko‘ra, Bayden yaqin hafta yoki oylarda qamoqxonaning keyingi taqdiri haqidagi hujjatni imzolaydi. Eslatib o‘tamiz, Guantanamo qamoqxonasi 11 sentyabr voqealaridan so‘ng 2002 yilda ochilgan. 2003 yilda Guantanamodagi mahbuslar 700 nafarga yaqinligi ma’lum qilingandi.