Turkiya Tashqi ishlar vaziri Mavlut Chovusho‘g‘li payshanba kuni Anqarada AQSh prezidentining milliy xavfsizlik bo‘yicha yordamchisi Robert O’Brayen bilan uchrashuv o‘tkazdi. Bu haqda jurnalistlarga Turkiya TIV xabar berdi.

Anadolu axborot agentligi ma’lumotlariga ko‘ra uchrashuv kengaytirilgan tarkibda, yopiq tartibda bo‘lgan va 45 daqiqa davom etgan.

Shuningdek, payshanba kuni mahalliy vaqt bilan soat 13:15 da (Toshkent vaqti bilan 15:15) AQSh vitse-prezidenti Maykl Pens ham Anqaraga yetib keldi. U Turkiya prezidenti Rajab Toyyib Erdo‘g‘on bilan uchrashishi kutilmoqda.

Pens boshchiligidagi Amerika delegatsiyasi Turkiyaga rasmiy tashrif bilan keldi. Tashrifdan maqsad turk tomonini Suriyadagi “Tinchlik bulog‘i” amaliyotini to‘xtatishga undash. Delegatsiya tarkibiga AQSh Davlat kotibi Mayk Pompeo, prezident Trampning milliy xavfsizlik masalalari bo‘yicha yordamchisi Robert O’Brayen va AQShning Suriya bo‘yicha maxsus vakili Jeyms Jeffri ham kirgan.