AQSh koronavirusning to‘rtinchi to‘lqiniga duch keldi. Bu haqda Fox News telekanali efirida Minnesota universiteti professori, epidemiolog Maykl Osterxolm ma’lum qildi.

Mutaxassisning so‘zlariga ko‘ra, hozirgi vaqtda birgina yaxshi yangilik shuki, amaldagi vaksinalar infeksiyaning Britaniya shtammiga qarshi samarali hisoblanadi.

3 aprel kuni har beshinchi amerikalik koronavirusga qarshi to‘liq emlanganligi haqida xabarlar tarqaldi. Ular Pfizer/BioNTech, Moderna yoki Johnson&Johnson preparatlari bilan emlanishgan. Shunga qaramay, ba’zi fuqarolar vaksina samaradorligiga ishonishmayapti.

So‘nggi ma’lumotlarga ko‘ra, AQShda 30,7 milliondan ortiq kishida COVID-19 infeksiyasi qayd etilgan. 554 mingdan ortiq bemor vafot etdi.