Armanistondagi inson huquqlari himoyachisi Arman Tatoyanning ta’kidlashicha, Ozarbayjon Tog‘li Qorabog‘dagi mojaro zonasida harbiy harakatlar paytida oq fosfirli bombalardan foydalangan. Obmudsman o‘z izlanishlari haqida Facebook sahifasida xabar qildi, deb yozmoqda Meduza nashri.

Ozarbayjon hozirgi kungacha olingan ma’lumotlarga ko‘ra Tog‘li Qorabog‘ga qarshi fosforli o‘q-dorilarni fuqarolar yashaydigan aholi punktlari yaqinidagi o‘rmonlarga o‘t qo‘yib ishlatmoqda. Ko‘plab fuqarolar ushbu o‘rmonlarda Ozarbayjon qurolli kuchlarining o‘q va hujumlaridan yashiringan.

Arman Tatoyan fosforli o‘q-dorilarning ishlatilishini ko‘rsatadigan videoni ham sahifasiga joylashtirdi.

Fosfirli bombalar qo‘llanishi haqida Tog‘li Qorabog‘ mudofaa armiyasi ham iddao qilmoqda.

Ozarbayjon Mudofaa vazirligi fosforli qurol haqidagi da’volarni asossiz deb atadi. "Ozarbayjon armiyasi xalqaro huquq tomonidan taqiqlangan qurol va o‘q-dorilar bilan qurollanmagan", - deyiladi vazirlik xabarida.

Oq fosfor ishlatilgan o‘q-dorilar 1949 yilgi Jeneva konvensiyasiga qo‘shimcha protokol bilan taqiqlangan.