Armaniston va Ozarbayjon 10 oktyabr soat 12:00 dan Tog‘li Qorabog‘da gumanitar sulh e’lon qildi. Rossiya, Armaniston va Ozarbayjon tashqi ishlar vazirlari o‘rtasida Moskvada 10 soatdan ko‘proq vaqt davomida bo‘lib o‘tgan muzokaralar yakunlari bo‘yicha tomonlar qo‘shma hujjatni kelishib oldilar.

Mojaro ishtirokchilari Xalqaro Qizil Xoch mezonlariga muvofiq mahbuslar va o‘ldirilganlarning jasadlarini almashadilar, dedi Rossiya tashqi ishlar vaziri Sergey Lavrov uchrashuvdan so‘ng. Otashkesimning o‘ziga xos parametrlari keyinroq e’lon qilinadi. Ozarbayjon va Armaniston YeXHT Minsk guruhi vositachiligi bilan mazmunli muzokaralarga o‘tishadi, muzokaralar formatlari o‘zgarmaydi.

Tan olinmagan Tog‘li Qorabog‘ Respublikasi prezidenti Arayik Arutyunyan 10:00 da matbuot anjumani o‘tkazishini ma’lum qildi. "Mavzu –mamlakatimizga qarshi olib borilgan urush, uning bu kunlarda qanday oqibatlarga olib kelgani va bizning buzilmas kurashimizdir", - deya xabar beradi Armaniston mudofaa vazirligining axborot markazi Facebook sahifasida.

Tog‘li Qorabog‘dagi mojaro 27 sentyabr kuni avj oldi. Rossiya va YeXHT Minsk guruhining boshqa mamlakatlari bir necha bor tomonlarni o‘t ochishni to‘xtatishga va muzokaralarga qaytishga chaqirgan. Armaniston va Ozarbayjon tashqi ishlar vazirlari Zograb Mnatsakanyan va Jayhun Bayramov o‘rtasidagi muzokaralar Rossiya tomoni ko‘magi bilan 9 oktyabr kuni boshlandi.