«Toshkent» telekanalining «Poytaxt-Vaziyat» dasturida «Aurum 898» tungi klubida sportchi Jamshid Kenjayevning o‘limiga sabab bo‘lgan fojia tafsilotlari ma’lum qilindi.

Aytilishicha, Jamshid Kenjayev 8 avgust kuni tanishining tug‘ilgan kuni munosabati bilan uyushtirilgan ziyofatda ishtirok etgan va spirtli ichimlik ichgan. Soat 23:30 atrofida tungi klubga borgan. Yonidagi pichoqni ko‘rgan qo‘riqchilar uni ichkariga qo‘yishmagach, ikki qo‘riqchiga pichoq bilan zarba bergan. Keyin qo‘riqchilar uning o‘zini kaltaklashgan. Jarohatlar oqibatida Kenjayev shifoxonada vafot etgan.

Toshkent shahar  prokuraturasi bo‘lim o‘rinbosari Farhod Boboniyazovning ma’lum qilishicha, tungi klubning 4 nafar qo‘riqchisiga nisbatan Jinoyat kodeksining 97- va 277-moddalari bilan jinoiy ish ochilgan.

Dasturda qayd etilishicha, qo‘riqchilarga xizmat vaqtida bitalar, pichoqlar va boshqa turdagi qurollardan foydalanishga ruxsat berilgan. Ayni vaqtda huquq-tartibot organlari tungi klub faoliyatini tekshirishmoqda.

Toshkent shahar  prokuraturasi vakilining so‘zlariga ko‘ra, marhum sportchining o‘ziga ham Jinoyat kodeksining tegishli moddalari asosida baho berilib, qonuniy qaror qabul qilinadi.