Toshkent viloyati Yangiyo‘l tumanida bedarak yo‘qolgan qiz Rossiyada topildi. Bu haqda IIBB matbuot xizmati xabar qildi.

Avvalroq ijtimoiy tarmoqlarda Toshkent viloyati Yangiyo‘l tumanida 18 yoshli Natalya F. ismli qiz bedarak yo‘qolgani haqida xabarlar tarqagan edi.

“Toshkent shahar IIBB jinoyat-qidiruv bo‘limi va Yangiyo‘l tuman IIB xodimlari hamkorlikda o‘tkazgan qidiruv natijasida qiz Rossiyadagi qarindoshlarinikiga ketgani ma’lum bo‘ldi”, - deyiladi xabarda.

IIBB xabariga ko‘ra, 16 may kuni soat 16:00 da Natalya chegarani kesib o‘tib, Qozog‘istonga o‘tgan. Qizning hamrohi bilan suhbatda u ilgari bir tanishiga Rossiyaga borishni taklif qilgani, ammo tanishi unga rad javobi bergani aniqlangan.

17 may kuni soat 10:00 dan 11:00 gacha bo‘lgan vaqt oralig‘ida Natalya noma’lum raqamdan o‘sha tanishiga qo‘ng‘iroq qilgan va poyezdda Qozog‘istonga ketayotganini xabar qilgan.

21 may kuni esa qiz dugonasiga SMS yuborib, Rossiyada ekanini yozgan. Ammo qaysi shaharda ekanini ko‘rsatmagan.

Natalyaning onasi Rossiyada ularning qarindoshlari borligini va qizi maktabni tamomlagach ularnikiga bormoqchi ekanini ma’lum qilgan. Lekin Natalya ketish oldidan onasiga hech narsani aytmagan.

“Qizim menga aytgan bo‘lar edi. U menga ishonadi”, - dedi Natalyaning onasi. Shu bilan u ijtimoiy tarmoqlardagi foydalanuvchilar tomonidan Natalyaning oilasidagi muammolar haqidagi taxminlarni ham rad etdi.

Keyinchalik qizning onasiga Novosibirskda ro‘yxatdan o‘tgan mobil raqamdan notanish kishi qo‘ng‘iroq qilgan. U internetda bedarak yo‘qolgan qiz haqidagi e’lonni ko‘rganini va darrov o‘zi Qozog‘istondan Novosibirskka kelgan avtobusda u qizni ko‘rganini aytgan.

Ayni damda Toshkent shahar IIBB Natalyaning onasi bilan aloqada bo‘lib turibdi va hodisani o‘rganmoqda.