Serbiyaning Belgrad shahrida boks bo‘yicha erkaklar o‘rtasidagi jahon chempionati hal qiluvchi pallada. Musobaqada chorak finallar yakunlandi. Endi navbat yarim finallarga.
-60 kg vaznli bokschimiz Abdumalik Xalakov JCh yarim finalida eronlik Daniyal Shaxbashga qarshi ringga ko‘tarilishi lozim edi. Biroq, eronlik bokschining jarohati jiddiy ekanligi sababli u ringga chiqmaydi va shu tariqa Abdumalik avtomatik ravishda finalga yo‘l oldi!
Hozirgina fransiyalik Sofiane Oumia hamda Dominikan Respublikasi sharafini himoya qilgan Aleks de la Kruz qarama-qarshiligi yakunlandi. Jangda Sofiane Oumia g‘alaba qozonib finalga chiqdi. Endi u finalda hamyurtimiz Abdumalik Xalakov bilan to‘qnash keladi.