Bugun Xalqaro press-klubda Bosh vazir o‘rinbosari Jamshid Qo‘chqorov, Sog‘liqni saqlash vaziri Alisher Shodmanov, Moliya vaziri Timur Ishmetov, Markaziy bank raisi Mamarizo Nurmuratov va Toshkent bosh imom-xatibi Nuriddin Xoliqnazarov ishtirokida sessiya bo‘lib o‘tdi.
Unda Bosh vazir o‘rinbosari, Iqtisodiy taraqqiyot va kambag‘allikni qisqartirish vaziri Jamshid Qo‘chqorov fondga bugungi kungacha 600 milliard so‘mga yaqin homiylik mablag‘lari kelib tushganini ta’kidladi.
Shuningdek, Bosh vazir o‘rinbosari quyidagilarni ma’lum qildi:
“Davlat o‘zining vazifasini tadbirkorga yuklamoqchi emas. Bir so‘m bo‘lsa, bir so‘m qoplab beradi.
Buni qanday bajaradi: jumladan, soliqni qisqartirishi, bank xizmatlaridan imkoniyatlar va elektr energiyani arzonlashtirib beradi. Bundan shubha bo‘lishi mumkin emas.
Bir so‘m bo‘lsa ham tadbirkorning puli davlatda qolib ketmaydi. Bu borada biz har kuni izlanishdamiz.
Kambag‘allikni kamaytirish borasidagi harakatlarimiz bir kun ham to‘xtagani yo‘q. Xalqaro tashkilotlar bilan hamkorlikdagi ishlarimiz ham davom etmoqda. Masalan, nochor oilalarni aniqlash davom etmoqda va iqtisodiy imkoniyatlarimiz inobatga olingan holda ularga ko‘maklashish ishlari haqida o‘ylamoqdamiz“, — dedi Jamshid Qo‘chqorov.