BMT bosh kotibi Antoniu Guterrish Isroil bosh vaziri Binyamin Netanyaxuning “hududdni bosib olishni xohlayotgani”ni aytgan so‘zlaridan keyin Iordan daryosining G‘arbiy qirg‘og‘i bilan bog‘liq vaziyatdan tashvishga tushganini bildirdi. Bu haqda TASS xabar bermoqda.
Avvalroq Netanyaxu mamlakatni boshqarayotgan “Likud” partiyasi parlament saylovlarida g‘alaba qozonsa, Iordan vodiysini Isroilga qo‘shib olish haqida gapirgandi.
Guterrishning so‘zlariga ko‘ra, agar Isroil bosh vaziri o‘zi aytgan gaplarni amalga oshiradigan bo‘lsa, bu xalqaro qonunlarni o‘ta qo‘pol ravishda buzish bo‘ladi.
Bundan tashqari, isroillik siyosatchining bu amali Falastin va Isroil o‘rtasida muloqot boshlash istiqbolini ham yo‘qqa chiqaradi.
“Bu muammo ayni hududda ikki davlat yashay olishi g‘oyasiga zarar yetkazadi”, deb ta’kidlagan Guterrish.