O‘zbekiston Respublikasi Bosh prokuraturasi jamoatchilik bilan aloqalar va huquqiy axborot bo‘limi boshlig‘i Hayot Shamsutdinovning ma’lum qilishicha, Surxondaryo viloyati, Sariosiyo tumanidagi “Chumchuqlijar“ chegara bojxona postida ayol F.K. xizmatni o‘tab kelayotgan bojxona inspektori L.X.ga qarshilik ko‘rsatib, uni haqorat qilib, bosh qismi va yuziga qo‘llari bilan urib, tan jarohati yetkazgan.

Xabarda aytilishicha, bojxonachiga zarar yetkazgan ayol 1973 yilda tug‘ilgan va tadbirkorlik bilan shug‘ullangan, lekin ayolning nima uchun xodim bilan tortishgani haqida hech qanday ma’lumot berilmagan.

Mazkur holat yuzasidan Sariosiyo tumani prokuraturasi tomonidan F.K.ga nisbatan JKning 219-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.