O‘zbekiston Respublikasi Prezidenti Shavkat Mirziyoyening joriy yil 21-22 yanvar kunlari Buxoro viloyatiga tashrifi davomida berilgan topshirig‘i ijrosini ta’minlash maqsadida viloyatda joylashgan madaniy meros ob’yektlari xatlovdan o‘tkazilmoqda.
O‘zbekiston Respublikasi Madaniyat vaziri o‘rinbosari-madaniy meros departamenti boshlig‘i K.Akilova, departament huzuridagi ilmiy-ekspert kengashi a’zolari tomonidan tabiiy sho‘rlanish, yemirilish, texnogen holatlar natijasida ta’mirtalab bo‘lgan madaniy meros ob’yektlari joyida o‘rganib chiqildi. Ular orasidan birinchi navbatda ta’mirlash-tiklash ishlari olib borilishi lozim bo‘lgan 40 ta ob’yektda tanlash jarayonlari davom etmoqda.
– Buxoro shahridagi “Toshsaroy” madrasasi, “Zabiyon-Dabiyon” masjidi Vobkent tumanida joylashgan “Tosh masjid”, G‘ijduvon tumanida joylashgan “Mirzayon” masjidi kabi o‘ta og‘ir ahvoldagi jami 40 ta ob’yektlar tanlab olindi, – deydi viloyat madaniy meros boshqarmasi bosh mutaxassisi Elbek Sobirov. – Tanlangan yodgorliklarda birinchi navbatda ilmiy-izlanishlar olib boriladi. Shu asosda loyiha hujjatlari ishlab chiqilishi bo‘yicha rejalar belgilab olindi— deya yozmoqda Uza.