2020 yilning 7 fevral kuni tonggi soat 6:00 da Yujnouralsk – Magnitogorsk trassasida Verxneuralsk tumani (Chelyabinsk viloyati) hududida ikki avtomobil ishtirokida yo‘l-transport hodisasi sodir bo‘lgan.

Uning oqibatida 3 kishi, jumladan O‘zbekiston fuqarosi M.R. vafot etgan, hamyurtlarimiz M.N. va A.R. jarohat bilan kasalxonaga yotqizilgan.

Tashqi mehnat migratsiyasi agentligi matbuot kotibi Ortiqxo‘ja Norovning yozishicha, mazkur vaziyat nazoratga olingan va jarohatlanganlar va ularning yaqinlari bilan aloqa o‘rnatilgan.

Tashqi mehnat migratsiyasi agentligining Moskva shahridagi vakolatxonasi Bosh konsulxona bilan birgalikda marhumaning jasadini turmush o‘rtog‘i hamrohligida vatanga jo‘natish bilan bog‘liq huquqiy va tashkiliy masalalarni hal qilmoqda.