Oliy Majlis Qonunchilik palatasining 2 aprel kuni bo‘lib o‘tgan majlisida «Go‘daklar va kichik yoshdagi bolalarning ovqatlanishi to‘g‘risida»gi qonun loyihasi muhokama qilingan.

Qonun loyihasida go‘daklarni ona suti bilan boqishni targ‘ib etish, shuningdek, bolalar oziq-ovqat mahsulotlariga qo‘yiladigan talablar, ularga rioya etish chora-tadbirlari, sertifikatlash masalasi hamda ushbu sohada tibbiyot xodimlarining o‘rni va vazifalari belgilab qo‘yilmoqda.

Bundan tashqari, sohani davlat tomonidan tartibga solish, unda Vazirlar Mahkamasi, Sog‘liqni saqlash vazirligi, fuqarolarning hamda fuqarolik jamiyati institutlarining vakolatlari ham aniqlashtirilmoqda, deya xabar berdi O‘zA. 

«Eng muhimi, qonun loyihasida go‘daklar, kichik yoshdagi bolalar bilan birga onalar bo‘lishi mumkin bo‘lgan tibbiyot muassasalarida, shuningdek, boshqa tashkilotlarda, jamoat joylarida tegishli sanitariya qoidalari va gigiyenik normativlarga javob beradigan go‘daklar va kichik yoshdagi bolalarni emizishga mos bo‘lgan maxsus ajratilgan joylar tashkil etilishi nazarda tutilmoqda», — deyilgan Oliy Majlis Qonunchilik palatasi axborotida.

Deputatlarning qayd etishicha, ushbu qonun loyihasi O‘zbekistonda «sog‘lom nasl va barkamol avlodni voyaga yetkazishga qaratilgan qator tadbirlarning mantiqiy davomi va qonuniy asosi bo‘lib xizmat qiladi».