Joriy yilning 20 iyun kuni O‘zbekiston Respublikasi Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida” 396-son qarori qabul qilindi.

Mazkur qarorga muvofiq endilikda, nogiron bolaning, shuningdek 16 yoshga to‘lmagan OIV infeksiyasiga chalingan shaxsning oilaga tarbiyaga olgan (patronat) tutingan ota-onasiga xam, tarbiyaga olingan tutingan bolasi uchun  nafaqa tayinlash tartibi joriy qilindi.

Shuningdek, pensiya tayinlash uchun ish staji “Yagona milliy mehnat tizimi” idoralararo dasturiy-apparat kompleksi (“YaMMT” IDAK) da mavjud ma’lumotlar asosida ham tasdiqlanishi belgilandi.

Qaror bilan, arxiv ma’lumotlarini taqdim etmasdan ish haqi miqdorini aniqlash:

2005-2016 yillar davri uchun – jamg‘arilib boriladigan pensiya tizimiga majburiy badallar to‘g‘risidagi ma’lumotlardan;

2016-2018 yillar davri uchun – O‘zbekiston Respublikasi Moliya vazirligi huzuridagi byudjetdan tashqari Pensiya jamg‘armasiga o‘tkazilgan sug‘urta badallarini yakka tartibda hisobga olishning markazlashtirilgan elektron reyestri ma’lumotlaridan;

2019 yil uchun – fuqarolarning ish haqining yakka tartibdagi hisobini yuritishning markazlashtirilgan elektron reyestri ma’lumotlaridan;

2020 yildan keyingi davr uchun – “YaMMT” IDAKda mavjud ma’lumotlardan kelib chiqib amalga oshiriladi.

Qabul qilingan qaror, Hukumatimizning aholining ijtimoiy himoyaga muxtoj bo‘lgan qatlamiga bo‘lgan doimiy e’tiborning yaqqol ifodasidir.