O‘zgidromet respublikadagi 22 ta shahar va boshqa aholi punktlarida joylashgan 61 ta turg‘un postda atmosfera havosining sifati bo‘yicha kunlik, mayda dispersli zarrachalar bo‘yicha esa oylik kuzatishlar olib boriladi. Bu Hukumatning 3 iyundagi qarorida o‘z aksini topgan.

Hujjat bilan shuningdek, 2021−2025 yillarda O‘zbekistonda atrof tabiiy muhit monitoringi dasturi ham tasdiqlangan.

Unga ko‘ra, suv resurslari, atmosfera havosi va tuproqlarni ifloslantiruvchi manbalar monitoringi, atmosfera havosi, yer usti va yer osti suvlari hamda yerlarning ifloslanishi monitoringi amalga oshiriladi.

Qolaversa, ko‘llar ekotizimlari, o‘simlik va hayvonot dunyosi ob’yektlari hamda atrof muhitning transchegaraviy ifloslanish monitoringi yuritiladi.

Ekologiya va atrof muhitni muhofaza qilish davlat qo‘mitasi 1 dekabrga qadar atrof tabiiy muhit davlat monitoringi tizimining Yagona geoaxborot ma’lumotlar bazasini to‘liq shakllantiradi.