Belarus Prezidenti Aleksandr Lukashenko mamlakatning asosiy qonunini o‘zgartirish kerakligini aytdi. Davlat rahbarining so‘zlariga ko‘ra, unga yangilangan konstitutsiyaning bir nechta variantlari taqdim etildi, ammo o‘zgarishlar "hal qiluvchi emas".

“Konstitutsiya asosiy qonundir. Ikki yil ichida buni qilamiz. Menga allaqachon bir nechta variant taklif qilingan, ammo ular mos emas. Odamlar shunchaki Konstitutsiyaga keskin o‘zgartirish kiritishdan qo‘rqishadi. Men buni qilishimiz kerak deb o‘ylayman. Konstitutsiya qabul qilinishidan oldin ham biz vakolatlarimizni tuman ijroiya qo‘mitalari raislariga, gubernatorga berish borasida ko‘p ishlarni amalga oshiramiz ", - dedi prezident.

Bu Lukashenko Belarus asosiy qonuniga o‘zgartirish kiritish to‘g‘risida birinchi marta gapirishi emas. 2020 yil aprel oyida u kelgusi besh yil ichida Belarusda yangi konstitutsiya qabul qilinishi haqida gapirgan edi. Undan ham oldin Lukashenko bu mavzuni 2019 yilda ko‘targan - noyabr oyida u konstitutsiya loyihasini tayyorlash ustida ishlaydigan mutaxassislar guruhini tuzishga va’da bergandi. Uning ta’kidlashicha, unga kiritilgan o‘zgartirishlar "shoshilinch ravishda" qabul qilinmasligi kerak va shuning uchun u biron bir muddatni belgilamaydi.

Hozir Belarus prezident respublikasi bo‘lib, prezident besh yilga saylanadi.

Keyingi saylovlar 9 avgust kuni bo‘lib o‘tadi va katta ehtimol bilan oltinchi muddatga saylanmoqchi bo‘layotgan Lukashenkoning hibsga olingan asosiy raqibi - bankir Vladimir Babariko unda ishtirok etmaydi. Babarikoning saylovoldi dasturidagi punktlardan biri 1994 yilgi konstitutsiyada belgilangan bir kishining prezidentlik muddati bo‘yicha cheklovni qaytarish edi.