Joriy yilning 1 yanvar kuni soat 03:30 larda 20 yoshli K.K. o‘zining to‘rt nafar tanishi bilan birga M.N. boshqaruvidagi Cobalt’ga o‘tirib, uning uyi tomon harakatlanishgan.

Shu payt, ko‘cha boshida harakatsiz turgan Gentra va Nexia-3 avtomashinalarni ko‘rishgan.

Ularning yonida turgan 23 yoshli M.A. va uning sheriklariga avtomashinalariga yo‘l berishlarini so‘rashgan vaqtida og‘zaki janjallashib qolishgan.

Janjal davomida M.A. o‘zining yonida bo‘lgan pichoq bilan K.K.ning ko‘krak sohasiga bir marta urib, sheriklari bilan avtomashinalariga o‘tirib, hodisa joyidan qochib ketishgan. K.K. esa, olgan tan jarohatlari natijasida vafot etgan.

Tergov departamentining xabar qilishcha, mazkur holat yuzasidan JKning 104-moddasi 3-qismi "d" bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, M.A. protsessual tartibda ushlangan.

Hozirda tergov harakatlari olib borilmoqda.