14 iyun, yakshanba kuni Fransiya prezidenti Emmanuyel Makron vatandoshlariga murojaat qilib, koronavirus epidemiyasi mag‘lub bo‘lganini ma’lum qildi.
Bugundan boshlab Yevropaning ichki chegaralari ochiladi, 1 iyuldan esa Shengen hududi tashqarisidagi "epidemiya to‘xtatilgan" mamlakatlar bilan aloqalar tiklanadi.
Fransiyaning ikkita dengiz orti hududi - Mayotta va Gvianadan tashqari barcha hududlari "yashil zona" ga kiradi. Bugundan kafe, bar, restoranlar ishlay boshlaydi, 22 iyundan boshlab barcha o‘quvchilar maktabga boradilar.
Epidemiya davrida Fransiyada 194 mingta zararlanish holatlari qayd etildi, 29 ming bemor infeksiyadan vafot etdi. Oxirgi sutkada 526 ta yangi zararlanish holati aniqlandi, 10 kishidan kamroq bemor vafot etdi.
Prezidentning so‘zlariga ko‘ra, hozirgi kunda asosiy vazifa mamlakatni iqtisodiy tiklash, tartib va ijtimoiy uyg‘unlikni saqlash bo‘ladi. Fuqarolarning teng huquqliligi, irqchilikka qarshi kurashning muhimligini eslatib, u "respublika tartibini" ta’minlab, huquq-tartibot idoralari xodimlarini qo‘llab-quvvatlashini ta’kidladi va Fransiya o‘z tarixida biron bir nomdan voz kechmasligini va qahramonlariga o‘rnatilgan biron bir yodgorlikni olib tashlamasligini ta’kidladi.
Prezident Makron iyul oyidagi chiqishida jonlanish dasturi tafsilotlarini e’lon qilishga va’da berdi.