Avvalroq, Toshkent shahar hokimligi poytaxtdagi eng ko‘rkam jamoat bog‘laridan biri — G‘afur G‘ulom madaniyat va istirohat bog‘ini 49 yilga BMP Smart Decision Private Limited xorij kompaniyasiga uni modernizatsiya qilish va jahon standartlariga javob beradigan zamonaviy parkni barpo qilishga oid investitsion majburiyat bilan berilganini ma’lum qilgan edi.

Shuningdek, modernizatsiya loyihasi o‘z ichiga eski attraksionlarni yangilariga almashtirishni, bog‘ning yashil hududini, bog‘da o‘sayotgan Davlat ekologiya va atrof-muhitni muhofaza qilish qo‘mitasi xatlovidan o‘tkazilgan daraxtlarga qo‘shimcha ravishda, yangi daraxtlar bilan to‘ldirishni o‘z ichiga olishi va rekonstruksiyadan keyin boqqa kirish avvalgiday bepulligicha qolishi aytilgan edi.

Bloger davletovuz'ning yozishicha, G‘afur G‘ulom parkini 49 yilga ijaraga olgan BMP Smart Decision Private Limited kompaniyasi 700 AQSh dollarlik boshlang‘ich kapital bilan ochilgan ekan.

Kompaniya ta’sischisi bo‘lgan «xorijlik investor» esa O‘zbekistondan, Toshkent shahar Yakkasaroy tumanidan Halimov Sherzod ekan.

Toshkent shahar hokimligi hozircha vaziyatga izoh bermadi.