Hindistonning GMR kompaniyasiga viloyatlardagi xalqaro aeroportlarni davlat-xususiy sheriklik shartlari asosida investorlarga berish bo‘yicha o‘tkaziladigan tenderlarda ishtirok etishga taklif etildi. Bu haqda Transport vazirligi axborot xizmati xabar bermoqda.
Transport vaziri o‘rinbosari Jasurbek Choriyev bilan bo‘lgan videokonferensiya shaklidagi uchrashuvda GMR Group vakillari Hindiston, Turkiya va Filippinda xalqaro aeroportlarni qurish, modernizatsiya qilish va boshqaruv tizimida amalga oshirilgan yirik loyihalar taqdimotini o‘tkazdi. Mazkur kompaniya “yashil aeroportlar” konsepsiyasini rivojlantirishda shuningdek, aeroportlarga innovatsion texnologiyalarni (yuzni aniqlash va tanish texnologiyalari, mobil telefonlar imkoniyatlaridan unumli foydalangan holda nazorat-o‘tkazish punktlaridan yo‘lovchilarni o‘tkazuvchanlik qobiliyatini bir-necha barobarga oshirish va boshqalar) o‘rnatishda katta tajribaga ega.
Uchrashuvda Transport vazirligi tomonidan Markaziy Osiyo logistika xabini tashkil etish borasida olib borilayotgan ishlar hususida ma’lumot berildi.
1978 yilda tashkil etilgan GMR Group Hindistonda eng yirik va dunyodagi to‘rtinchi eng katta xususiy aeroportlarni rivojlantirish kompaniyasi bo‘lib, 2000 yillardan beri ushbu sohada faoliyat olib boradi. U Dehli va Haydarobod (Hindiston) aeroportlariga egalik qiladi Maktan-Sebu (Filippin) aeroportini boshqaradi. Kompaniya, shuningdek, energetika, transport (avtomobil yo‘llari, temir yo‘llar, metro, uchish-qo‘nish yo‘laklari qurish) va shahar infratuzilmasi sohasida ham ishlaydi.