Bugun AOKA huzuridagi shtabda bo‘lib o‘tgan brifingda Davlat xizmatlari agentligi matbuot kotibi Sevara Zokirova kuchaytirilgan karantin sharoitida fuqarolardan kelib tushgan savollarga javob berdi.
— Karantinda Davlat xizmatlari markazlari va FHDYo bo‘limlari ishlayaptimi? Ularga qanday murojaat qilishim mumkin?
— Davlat xizmatlari markazlari orqali ko‘rsatiladigan barcha davlat xizmatlari elektron shaklda my.gov.uz portali orqali onlayn tarzda va faqat kechiktirib bo‘lmaydigan holatlardagina idoralarda amalga oshirilmoqda.
FHDYo bo‘limlarida fuqarolarni qabul qilish xodimlarning navbatchiligi asosida kechiktirib bo‘lmaydigan holatlardagina (tug‘ilish va o‘lim haqidagi dalolatnoma yozuvlarini qayd qilish uchun) tashkil qilingan darcha orqali amalga oshirilmoqda.
Shuningdek, idoralarimizdagi xodimlar mehnat ta’tiliga chiqarilganligi va xodimlarning bir qismi masofadan turib ishlashga o‘tganligi sababli idoralar faoliyatida ayrim uzilishlar bo‘lishi mumkin.