Avval ma’lum qilinganidek, bugun AOKA shtabida Sog‘liqni saqlash vazirligi huzuridagi Koronavirusga qarshi kurash shtabi a’zosi Habibulla Oqilov ishtirokida brifing bo‘lib o‘tdi.
Brifingda muhim savol va murojaatlar yuzasidan javob qaytarildi.
Savol: Xususiy klinikalarga ham virusga test tahlil olishga ruxsat berilganini eshitdim. Bu testlar qanday amalga oshiriladi? Ekspress-testlar yordamidami yoki laboratoriya tekshiruvlari bilanmi? Ushbu testlar natijalarining aniqlik foizi qancha?
Javob: Xususiy klinikalarda test o‘tkazish qarori ishlab chiqilmoqda. O‘zbekistonda testlar laboratoriyada polimeraza zanjirli reaksiyasi yordamida amalga oshiriladi. O‘ziga xoslik, sezuvchanlik va ma’lumotlar aniqligi yuqori darajada.
Ekspress-testlar bizda o‘tkazilmaydi.
Savol: Karantin vaqtida bachadon miomasini olish bo‘yicha qayerda operatsiya qilish mumkin. 103 javob bermayapti. Skuterda shoshilinch tibbiy yordam markaziga bordik. U yerda qon to‘xtatuvchi ukol qilishdi va karantin vaqtida hech kim operatsiya qilmasligini aytishdi.
Javob: Bu masalada akusherlik va ginekologiya ixtisoslashgan markazi direktoriga murojaat qildik. Ularning ta’kidlashicha, Markazda yotqizish va operatsiya o‘tkazishda hech qanday to‘siq va muammolar yo‘q ekan.