Hozirgi kunda ijtimoiy tarmoqlardagi marketing (SMM - Social media marketing) rivojlanib bormoqda. Mamlakatimiz iqtisodiyotining qon tomiri bo‘lmish banklarimiz bu borada qanaqa ishlar amalga oshirishmoqda. Sof.uz muxbiri bu borada ijtimoiy tadqiqot olib borib, yurtimizdagi eng ommabop ijtimoiy tarmoqlardan biri — Telegramda banklarimiz qay darajada faol ekanligini o‘rgandi.

Banklarimiz orasida Agrobank, O'zSQB bank hamda Kapital bank eng yaxshi natijalar qayd etishgan: ularning Telegram sahifalarida 10 000 dan ziyod obunachilar bor. Eng past ko‘rsatkich esa Farg‘onaning Madad Invest banki, Davr bank hamda Universal bankka tegishli bo‘lib, ular ijtimoiy tarmoqda 200 nafar ham obunachi yig‘a olishmagan. 

UzAgroeksport bank, Eron Saderat bank,KDB bank va yaqinda ochilgan Tenge bankning  umuman Telegram kanallari mavjud emas. Hayratlanarlisi, ustav kapitali miqdoriga ko‘ra mamlakatimizda 2-o‘rinda turadigan Asaka bank ham SMM bilan yetarlicha shug‘ullanmaydi. 

Kapital bank, Trast bank, Turkiston bank hamda Universal bank xabarlarni faqat rus tilida chop etsa, Mikrokredit bank, Madad Invest banklar faqat o‘zbekcha post qilishadi. Qolgan banklar esa ikkala tilda ham xabarlar berib borishadi.