Belarus poytaxti Minsk yana namoyishlarga "mezbonlik qildi". Bu safargi namoyishlar 9 avgustda bo‘ladigan prezidentlik saylovlarida amaldagi prezident Aleksandr Lukashenkoga yagona muxoliflik qilayotgan Svetlana Tixanovskayani qo‘llab-quvvatlash uchun tashkil qilindi. «Bahor» (Vesna) huquqni himoya qilish markazi ma’lumotlariga ko‘ra, unda 63 ming kishi ishtirok etgan.
Mahalliy Tut.by nashri xabariga ko‘ra, "Xalqlar do‘stligi" bog‘ida "tashviqot piketi" qatnashchilari to‘planishdi. Aksiya konsert shaklida bo‘lib, soat 18:00 da boshlandi, ammo ba’zi ishtirokchilar oldinroq kelishdi.
"Bizning kuzatuvchilarga ko‘ra, mitingda kamida 63 ming kishi qatnashgan", deyiladi xabarda.
Miting o‘tkazilgan joyda mobil aloqa bilan bog‘liq jiddiy muammolar kuzatilgan. Tadbirda qamoqda saqlanayotgan Viktor Babariko va uning o‘g‘li Eduard, Pavel Severins, Nikolay Statkevich, Dmitriy Furmanov, shuningdek Rossiyaga qochib ketgan Valeriy Sepkalolar nomidan so‘zlar aytildi. Bundan tashqari, dramaturg va ssenariy muallifi Andrey Kureychik tomoshabinlarga murojaat qildi. U hamma "Vataniga, farzandlariga va oilalariga bo‘lgan muhabbat tufayli" Xalqlar do‘stligi maydoniga to‘planganini aytdi. "Sevgi bizni ovoz berishga, divandan turishga va hamma narsani qilishga majbur qiladi. Svetlana Tixanovskaya ham Sergey Tixanovskiyga bo‘lgan muhabbati tufayli shu yerda”, - deya qo‘shimcha qildi Kureychik.
Tixanovskayaning o‘zi tadbirga taxminan soat 20:00 da keldi va sahnaga chiqdi. Avval miting ishtirokchilariga belarus tilida, keyin esa rus tilida murojaat qildi:
«Aytmoqchimanki, erim odamlarning ko‘zlarini ochdi va o‘zgarishga umid qildi. U ikki oydan beri qamoqda. Menga hokimyat kerak emas, lekin erim panjara ortida. Men bolalarni yashirishim kerak edi. Men chidashdan charchadim, jim bo‘lishdan charchadim, qo‘rqishdan charchadim ”, - dedi nomzod.
Tixanovskayaning so‘zlariga ko‘ra, Belarus hukumati byudjet mablag‘larini "muz saroylari, slavyan bozorlari" ga sarflamoqda, ammo ular oddiy odamlar va kasal bolalar uchun yetarli emas. "Nima uchun bizning farovonligimiz uchun pul faqat hokimiyat xohlagan narsaga beriladi, va keksa odamlar magistrallarda va o‘tish joylarida rezavor mevalarni va paypoqlarni sotishga majbur bo‘ladimi?" - deb so‘radi u.
Prezidentlikka nomzod uning siyosatda hokimiyat uchun emas, adolat yo‘lida bo‘lganini qayd etdi. "Biz jamoalarni umumiy maqsad - yangi Belarusni qurish uchun birlashtirdik. Ammo biz sizsiz buni qila olmaymiz. Saylovga keling ”, deya qo‘shimcha qildi u.
Tixanovskaya agar u prezident bo‘lsa, uchta narsani amalga oshirishga va’da berdi: siyosiy va iqtisodiy mahbuslarni ozod qilish, 1994 yil Konstitutsiyasini qaytarish bo‘yicha referendum o‘tkazish va odamlar o‘zlari kimga ovoz berishni tanlashlari uchun olti oy ichida barcha muqobil nomzodlar ishtirokida yangi prezident saylovlarini o‘tkazish.
Tadbir soat 22:00 atrofida yakunlandi. So‘nggi ma’ruzachining nutqidan so‘ng ishtirokchilar tarqalishni boshladilar, keyin xavfsizlik kuchlarining avtoulovlari va avtobuslari ko‘rindi. Hibsga olinganlar haqida xabar berilmagan.
Joriy yilning 9 avgust kuni Belarutsia prezident saylovlari bo‘lib o‘tadi. Markaziy saylov komissiyasi besh kishini prezidentlikka nomzod sifatida ro‘yxatga olishga qaror qildi: Andrey Dmitriyev, Anna Kanopatskaya, Aleksandr Lukashenko, Svetlana Tixanovskaya, Sergey Cherechen. Amaldagi prezidentning asosiy raqiblari deb hisoblangan ikki nomzod (Babariko va Sepkalo) ro‘yxatga olinmadi.