Namangan shahrida Navro‘z bayrami tantanalari doirasida 20-21 mart kunlari ilk bor tashkil etiladigan "Sumalak sayli" turizm va milliy qadriyatlar festivali davomida 5 tonnalik qozonda sumalak tayyorlanadi. 

Xabarda aytilishicha, buncha miqdordagi sumalakni tayyorlash uchun 2 tonna bug‘doy ivitiladi. Bug‘doydan tashqari, 2 tonna un, 1 tonna yog‘, 450 kg zog‘ora uni, 50 kg novvot ishlatiladi. Sumalakni tayyorlash uchun 25 nafar onaxon – sumalak ustalari jalb etiladi.

Tayyorlangan sumalak barcha tashrif buyurgan mehmonlarga tortiq qilish bilan birga, qariyalar va mehribonlik uylariga, mahallalardagi kam ta’minlangan oilalarga tarqatiladi.

Eslatib o‘tamiz, 2017 yil 8 sentyabr kuni Toshkentda "O‘zbegim" festivali doirasida 7360 kilo palov tayyorlangan va Ginnesning rekordlar kitobiga kiritilgandi.