Ijtimoiy tarmoqlarda Namanganda o‘zbek tilida, lotin yozuvida bo‘lmagan reklama bannerlari olib tashlanayotgani haqida xabarlar tarqaldi.

2020 yil 12—15- yanvar kunlari Namangan shahri, Uchqo‘rg‘on, Uychi, Chust, Pop va Yangiqo‘rg‘on tumanlarida «Reklama to‘g‘risida»gi qonun hamda Vazirlar Mahkamasining «Tashqi reklama bozorini tartibga solish to‘g‘risida»gi qarori ijrosini ta’minlash maqsadida ishchi guruh tomonidan o‘rganishlar olib borilgan.

Ishchi guruh tarkibiga til bo‘yicha maslahatchilar, Monopoliyaga qarshi kurashish qo‘mitasining hududiy boshqarmasi mutaxassislari va mahalliy hokimliklar vakillari kiritilgan.

— O‘rganishlar davomida «Reklama to‘g‘risida»gi qonun talablari va davlat tili me’yorlariga javob bermaydigan 586 ta reklama bannerlari olib tashlandi. Ularning aksariyati yo‘llarga, trotuarlarga o‘rnatilgan, panjaralar, hatto daraxtlarga mixlangan. Bu nafaqat reklama qonunchiligi, balki ekologiya talablarining ham buzilishi hisoblanadi. Ularning til me’yorlariga to‘g‘ri kelmasligi, orfografik xatolarga to‘la ekanligi haqida gapirmasa ham bo‘ladi. Shunday ekan, o‘zbek tilida, lotin yozuvida bo‘lmagan reklama bannerlari olib tashlangani haqida tarqatilgan xabarlar haqiqatga to‘g‘ri kelmaydi, — deydi viloyat hokimining davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Ulug‘bek Shermatov.

Shermatovning aytishicha, o‘rganishlar davomida yana 274 ta holatda reklamalarning davlat tilida, lotin alifbosida to‘g‘ri yozilishi bo‘yicha tushunchalar ham berilib, ogohlantirish xatlari taqdim etilgan.