Sog‘liqni saqlash vazirligi Jamoatchilik bilan aloqalar bo‘limining xabar berishicha, bugun kasbiga sadoqatli tibbiyot xodimlarining astoydil sa’y-harakatlari natijasida Namangan viloyatdagi to‘rt nafar koronavirusni yuqtirgan fuqaro butunlay sog‘ayib, reabilitatsiyaga olindi.
Ular viloyat sog‘liqni saqlash boshqarmasi boshlig‘i Solijon Mo‘minov va boshqa mas’ullar tomonidan viloyat reabilitatsiya markaziga kuzatib qo‘yildi. Kasallikdan tuzalgan fuqarolar ma’lum muddat shu yerda karantinda bo‘ladi.
– Bugun mening hayotimda unutilmas sana. Xuddi qayta dunyoga kelgandek his etyapman o‘zimni, – deydi bemor. – Bizni o‘ylab shunchalik sharoit yaratib bergan Prezidentimizga behisob rahmat. Shifokorlarimizdan bir umr minnatdormiz. Ular o‘zlarining jasoratli xizmatlari, yuksak malakalari, insoniy munosabatlari bilan bizni oyoqqa turg‘azishga sabab bo‘lishdi.
Eslatib o‘tamiz, 10 aprel holatiga ko‘ra yurtimizda koronavirus yuqtirganlar 624 nafarni tashkil qilmoqda. Ulardan 42 nafari ushbu kasallikdan to‘liq forig‘ bo‘lishdi, 3 nafari esa vafot etdi.