10 mart, yakshanba kuni Toshkentda futbol bo‘yicha O‘zbekiston Superligasi 1-turi doirasida Namanganning «Navbahor» jamoasi Qo‘qonning «Qo‘qon-1912» klubi bilan bellashdi.
Tomonlarning 1:1 hisobidagi durang natijasi bilan yakunlangan bahsdan so‘ng, namanganlik muxlislar Namanganga qaytishda avtohalokatga uchragan.
«Navbahor» muxlislar klubi yetakchisi Farhod Umaraliyevning ma’lum qilishicha, «Navbahor»ning 5 nafar muxlisi bo‘lgan Nexia avtomobili To‘raqo‘rg‘onda qarama-qarshi yo‘nalishdagi Damas bilan to‘qnashib ketgan. Oqibatda Nexia’dagi 2 nafar muxlis voqea joyida vafot etgan. 3 nafar muxlis esa kasalxonaga joylashtirilgan. Ularning bari koma holatida bo‘lgan. So‘nggi ma’lumotlarga ko‘ra, jarohatlanganlardan birining ahvoli yaxshilanib, palataga olingan.
Ta’kidlash joiz, «Navbahor»—«Qo‘qon-1912» bellashuvi Namangandagi markaziy stadion tayyor emasligi boisdan Toshkentga ko‘chirilgandi.