O‘zbekiston YeOII bozorida to‘laqonli ishtirok etishni rejalashtirmoqda

O‘zbekiston YeOII bozorida to‘laqonli ishtirok etishni rejalashtirmoqda

O‘zbekiston hukumati YeOII mamlakatlarida qabul qilingan 26 ta texnik reglament asosida maxsus texnik reglamentlarni ishlab chiqish va tasdiqlashni rejalashtirmoqda. Bu haqda 2021 yilgi davlat dasturi loyihasida so‘z boradi.

Dastur loyihasida Yevrosiyo iqtisodiy ittifoqiga a’zo bo‘lgan davlatlar bozorlarida to‘laqonli ishtirok etish uchun milliy texnik tartibga solish me’yorlarini ularning talablariga moslashtirish bo‘yicha ishlarni jadallashirish vazifasi belgilangan.

Unga ko‘ra, «O‘zstandart» agentligi, Investitsiyalar va tashqi savdo vazirligi, Iqtisodiy taraqqiyot vazirligi, manfaatdor vazirlik va idoralar yil davomida YeOII texnik reglament talablarini qabul qilish, YeOII mamlakatlarida qabul qilingan 26 ta texnik reglament asosida maxsus texnik reglamentlarni ishlab chiqish va tasdiqlash, ishlab chiqariladigan mahsulotlarning raqobatbardoshligini oshirishi lozim.

Bundan tashqari, O‘zbekiston hukumati Yevrosiyo iqtisodiy ittifoqi doirasida qabul qilinayotgan hujjatlar, o‘tkazilayotgan tadbirlar va rejalashtirilayotgan harakatlar to‘g‘risida ma’lumotlarni yig‘ish, o‘rganish va tahlillarni amalga oshirish taklifini jamoatchilik muhokamasi uchun bildirgan.

Avvalroq Rossiya bosh vaziri o‘rinbosari Aleksey Overchuk Gaydar forumida Rossiya 2020 yili Yevrosiyo iqtisodiy ittifoqida kuzatuvchi maqomini olgan O‘zbekiston yaqin istiqbolda ittifoqning to‘laqonli a’zosi bo‘lishiga umid bog‘laganini ma’lum qilgandi.

Eslatib o‘tamiz, 2020 yil 11 dekabr kuni bo‘lib o‘tgan Yevrosiyo iqtisodiy ittifoqining (YeOII) videoanjuman shaklidagi sammitida O‘zbekiston va Kubaga tashkilot huzuridagi kuzatuvchi davlat maqomini berish to‘g‘risida qaror qabul qilingandi.