Sport telekanali 9 noyabrda bo‘lib o‘tadigan O‘zbekiston – Qirg‘iziston o‘rtasidagi o‘rtoqlik uchrashuvini jonli efirda ko‘rsatilishini rasman ma’lum qildi.

Kecha terma jamoa bosh murabbiyi Vadim Abramov muhim bahslar oldidan raqiblarimiz o‘yin uslubimizni o‘rganmasligi hamda o‘rtoqlik uchrashuvini muxlislar bilan “liq to‘la” maydonda o‘tkazishni istayotgani tufayli uchrashuv telekanal orqali ko‘rsatilmasligi ma’lum qilingan edi.

Bugun Axborot va ommaviy kommunikatsiyalar agentligida futbolga oid matbuot anjumani o‘tkazildi. Unda futbolimiz rahbariyati va Vadim Abramov ishtirok etdi.

Unda jurnalistlar Qirg‘izistonga qarshi bahs translyasiya qilinmasligining sababini so‘rashganida, murabbiy bunga hech qanday qarshiligi yo‘qligini aytdi va "Sport TV" namoyish etishiga qarshi emasligini bildirdi. Shundan so‘ng telekanalning rasmiy telegram sahifasida O‘zbekiston - Qirg‘iziston uchrashuvi jonli efirda olib berilishi ma’lum qilindi.