Avval xabar qilganimizdek, bugun 14 yanvar kuni O‘zbekiston Tashqi ishlar vaziri Abdulaziz Komilov Hindistonga tashrif buyurdi.

Tashqi ishlar vazirligi matbuot xizmati xabariga ko‘ra, bugun Abdulaziz Komilov Hindiston Respublikasi Tashqi ishlar vaziri Subrahmanyam Jaishankar bilan uchrashdi.

Suhbat boshida O‘zbekiston TIV rahbari Hindiston Tashqi ishlar vazirligi shafeligida o‘tkazilayotgan “Raisina Dialogue” beshinchi xalqaro konferensiyasiga taklif uchun minnatdorlik izhor etdi.

Uchrashuvda Prezident Shavkat Mirziyoyev va Bosh vazir Narendra Modi o‘rtasidagi muhim kelishuvlarga asoslangan O‘zbekiston-Hindiston hamkorligining holati va istiqbollari muhokama qilindi.

Vazirlar 2020 yilda bo‘lib o‘tadigan oliy va boshqa darajalardagi uchrashuvlar jadvali, qo‘shma tadbirlar o‘tkazish muddatlari bo‘yicha takliflarni ko‘rib chiqdilar.