O‘zbekistonda 1 iyundan ayrim tadbirkorlar soliqlarni bo‘lib-bo‘lib to‘laydi. Bu haqda Davlat soliq qo‘mitasi xabar berdi.

Ushbu imtiyoz uch yildan ortiq vaqtdan buyon faoliyat ko‘rsatayotgan hamda soliqlarni muddatida to‘lab kelgan xo‘jalik sub’yektlariga tatbiq etiladi. Tahlillarga ko‘ra, soliq to‘lovchi yuridik shaxslarning 201,3 mingdan ortig‘i (67,7 foizi) uch yildan ortiq vaqtdan buyon faoliyat ko‘rsatib kelmoqda.

Ular bilan o‘tkazilgan muloqotlar natijasida 43,5 mingtasining muammolari segmentlab olindi. Shundan 13 mingtasi bevosita byudjet bilan munosabatlarini optimallashtirishni so‘ragan, deyiladi Soliq qo‘mitasi xabarida.

Shuningdek, 2020 yilda tadbirkorlik sub’yektlariga 7,7 trillion so‘mdan ortiq soliq imtiyozlari va yengilliklar berilgan. 224 mingta sub’yektning 1,3 trillion so‘mlik soliq qarzini majburiy undirish choralari to‘xtatib turilgan. Bunga javoban tadbirkorlik sub’yektlari soliqlarining 95 foizini ixtiyoriy ravishda o‘z muddatida to‘lagan.