AOKA huzuridagi shtabda Sanitariya-epidemiologik osoyishtalik agentligi direktorining birinchi o‘rinbosari Botir Qurbonov ishtirokida brifing bo‘lib o‘tdi.
Brifingda aholi tomonidan yo‘llangan savollarga javob qaytarildi:
— Maxsus komissiya qaroriga ko‘ra koronavirus aniqlangan bemorning davolanish xarajatlarini u kasallik yuqtirgan muassasa yoki tashkilot to‘lar ekan. Agar kasallik qayerdan yuqtirilganligi konkret aniqlanmasa, u holda davolanish xarajatlarini kim to‘laydi?
— Sanitariya-epidemiologik osoyishtalik agentligining malakali epidemiologlari tomonidan epidemiologik surishtiruv to‘laqonli olib borilmoqda va har bir aniqlangan kasallik holatining manbasi aniqlanmoqda. Bu jarayonda IIV bilan xam xamkorlik yo‘lga qo‘yilgan.
— Agar O‘zbekiston fuqarosi chet elda boshqa kasallikdan vafot etsa, uning jasadi olib kelingandan so‘ng mayit tobut bilan dafn etiladimi yoki islom an’analariga muvofiqmi?
— Ushbu holatda xaqiqatda COVID-19 mavjud emasligi to‘g‘risida ma’lumotnoma taqdim etilsa dafn marosimlari odatdagi tartibda amalga oshirishi mumkin.
— Koronavirus info telegram kanalida Bergamo shahrida koronavirusdan vafot etganlar jasadi kuydirilishi haqida ma’lumot o‘qidim. O‘zbekistonda ham shunday chora ko‘riladimi?
— COVID-19 koronavirus infeksiyasi tasdiqlangan va ushbu kasallikdan vafot etgan bemorlar Sanitariya-epidemiologik osoyishtalik markazlarining mutaxassislari ishtirokida qat’iy sanitariya-gigiyena talablari asosida hamda zararsizlantirish olib borilib Islom dini urf-odatlari bo‘yicha dafn etilmoqda.
— Piskent shahri "qizil" hududga kiritilgani sabab, Olmaliqqa shahriga Piskent orqali o‘tuvchi yo‘l to‘sib qo‘yilgan. Olmaliq "yashil" hudud bo‘lsa ham unga o‘tish yo‘llari yopilishi mumkinmi?
— Karantin talablari bo‘yicha qizil hudud va yashil hududlar o‘rtasida xarakatlanish to‘xtatladi, ya’ni "qizil" toifadagi hududga kirish va chiqish taqiqlanadi.