O‘zbekistonda ob-havo keskin pasayishi kutilayotgani sababli YHXBB haydovchilarni transport vositalarining texnik sozligiga, shinalar sovuq ob-havoga chidamligiga e’tiborli bo‘lishga chaqirdi.

«O‘zgidromet» bergan ma’lumotga ko‘ra, 30 sentyabrda O‘zbekistonning shimoliy hududlariga, 1—3 oktyabrda respublikaning qolgan hududlariga Volga bo‘yi orqali Rossiya Yevropa qismining (Moskva viloyati) markaziy hududlari ustida shakllangan sovuq va nam havo massalari kirib keladi.

1—3 oktyabrda havo harorati kechasi 3-8 darajagacha, kunduzi 12-17 darajacha, shimolda kechasi 0-5 darajagacha iliq, kunduzi 10-15 darajagacha pasayadi. 1—2 oktyabrda respublika bo‘yicha ba’zi joylarda, 3 oktyabrda Farg‘ona vodiysi viloyatlarida yomg‘ir yog‘adi, 2—3 oktyabrda tog‘oldi va tog‘li hududlarda ba’zi joylarda kuchli bo‘lishi mumkin.

«Ob-havo sharoitining keskin o‘zgarishi kutilayotganini inobatga olib, barcha haydovchilardan boshqaruvidagi transport vositasining texnik sozligini tekshirib, shina protektori naqshlarining qoldiq balandligi belgilangan me’yorda bo‘lishiga e’tiborli bo‘lib, yo‘llarda o‘ta ehtiyotkorlik bilan qoidalarga rioya qilgan holda harakatlanishlarini so‘raymiz», — deyiladi YHXBB xabarida.