Oliy Majlis Senati a’zosi, Qoraqalpog‘iston xalq yozuvchisi, jurnalist, «El-yurt hurmati» ordeni sohibi Sharap Usnatdinov 78 yoshida vafot etdi. Bu haqda Senat matbuot xizmati xabar berdi.
Jurnalist, siyosatchi Sharap Usnatdinov 1942 yil Kegeyli tumanida tug‘ilgan. Toshkent davlat universitetining (hozirgi O‘zMU) jurnalistika fakultetini tugatgan. Yozuvchi, jamoat arbobi «Kimga kech, kimga tong sahar», «So‘nggi ovchi», «Ko‘rganlarim, ko‘ngildagilarim», «Birinchi qoraqalpoq baletmeysteri», «Shoirning yoshligi» kabi roman va qissalar yozib qoldirgan.
Sharap Usnatdinov Nuroniy jamg‘armasining Qoraqalpog‘iston Respublikasi Kengashi raisi sifatida uzoq yillar faoliyat yuritgan. U 2020 yil yanvarida o‘tkazilgan saylovlarda Senat a’zosi etib saylangan va yangilangan Senatning eng keksa a’zosi bo‘lgandi.
Xabarda marhumning o‘limi sababiga aniqlik kiritilmagan.