“O‘zsanoatqurilishbank” ATBning 5 yilga mo‘ljallab chiqargan 300 million dollar qiymatidagi xalqaro obligatsiyasi London birjasida listingga qo‘yildi. Bu haqda bank matbuot xizmati xabar bermoqda.

Moliyaviy konsultantlar tavsiyasiga ko‘ra, obligatsiyaning ilk daromadlilik darajasi 6,50 % etib belgilandi. Obligatsiya tranzaksiyasi 08:23 (London vaqti bilan)da e’lon qilingan bo‘lsa, soat 10:00 da tranzaksiya to‘liq qoplandi, ya’ni chiqarilgan obligatsiyalarni to‘liq sotib ololadigan xaridorlar topildi va soat 12:10ga kelib 800 million dollarni tashkil etdi.

Oradan ikki soat o‘tgach (14:00da) buyurtmalar kitobi $1,2 mlrd. (tranzaksiyadan 4 barobar ko‘p buyurtma) bilan yopildi.

Obligatsiyalarning daromadlilik stavkasi uch marta pasaytirildi, ya’ni obligatsiyaning “narxi” oshdi: London vaqti bilan soat 12:25da 0.125%ga pasaytirilib, 6.375 %ni tashkil qildi. Buyurtmalar kitobi yopilgach, yana 0.375%ga pasayib, 6%ni tashkil qildi. Soat 17:00da esa 5.75%ni tashkil qildi.

Mazkur tranzaksiya O‘zbekiston tarixida ilk bora “O‘zsanoatqurilishbank” ATB tomonidan chiqarilgan korporativ xalqaro obligatsiyalar boshqa tijorat banklari va korxonalar uchun “benchmark” bo‘lib xizmat qiladi.

O‘zSQBning obligatsiyalarini sotib oladigan investorlar tijorat bankni Rossiyaning “Moskovskiy kreditniy bank” (5 yillik 5.3%), Gruziyaning “TBC bank” (5 yillik 5.75 % kupon) hamda Turkiyaning “Akbank” (5 yillik 6%) banklari obligatsiyalari bilan taqqosladilar.