Armaniston Bosh vaziri Nikol Pashinyan Tog‘li Qorabog‘da bo‘lib o‘tayotgan voqealarni Turkiyaning genotsid siyosatining davomi deb atadi. Bu haqda u Hindistonning WION telekompaniyasiga bergan intervyusida aytib o‘tdi, deb yozadi RIA Novosti.
"Men Tog‘li Qorabog‘da sodir bo‘layotgan voqealar va turklarning borligi Turkiyaning armanlarga nisbatan genotsid siyosatining davomi deb bilaman. Ma’lumki, XX asrning boshlarida, xususan 1915 yilda, armanlarning qirg‘ini Usmoniylar Turkiyasida yuz bergan. dunyoning ko‘plab davlatlari tomonidan tan olingan va natijada juda katta hududlarda etnik tozalash amalga oshirilgan", - dedi Pashinyan.
Uning so‘zlariga ko‘ra, "Turkiya 100 yil o‘tib, armanlarga qarshi genotsid siyosatini davom ettirish uchun Janubiy Kavkazga qaytib keldi".
"Buning o‘ziga xos pragmatik maqsadi bor. Chunki Janubiy Kavkazdagi armanlar Turkiyaning janubiy, sharqiy va janubi-sharqdagi imperialistik siyosatini davom ettirish yo‘lidagi so‘nggi to‘siqdir. Va shu nuqtai nazardan, ha, Tog‘li Qorabog‘ aholisi ekzistensial tahdidga duch kelmoqda va biz muammoni hal qilishning eng to‘g‘ri va amaliy usuli "najot uchun ajralib chiqish" formulasidan Tog‘li Qorabog‘ armanlari xavfsizligini ta’minlash uchun foydalanish deb o‘ylaymiz", - dedi Armaniston Bosh vaziri.
Uning so‘zlariga ko‘ra, Turkiya ushbu jarayonda ishtirok etishini yashirmaydi. "Turkiyaning yuqori martabali mulozimlari Ozarbayjonni jang maydonida qo‘llab-quvvatlashlarini va Turkiya qurolli kuchlari vakillari va Turkiya harbiy texnikalari, xususan Bayraktar (Bayroqdor) uchuvchisiz samolyotlari, ularning o‘nga yaqinini Tog‘li Qorabog‘ning o‘zini o‘zi himoya qilish kuchlari tomonidan urib tushirilganligi Turkiyaning bevosita aloqasi borligidan dalolat beradi. Shuningdek, Turkiya Suriyadagi yollanma askarlar va terrorchilarni yollashi va ularni mojaro zonasiga o‘tkazayotganiga oid dalillar mavjud", - deya ta’kidladi Pashinyan.
Pashinyan, shuningdek, Turkiyaning Qorabog‘dagi harakatlari NATOga bir oz mas’uliyat yuklashini aytdi. "Turkiya NATO a’zosi va menimcha, Tog‘li Qorabog‘ga qarshi urushda Turkiya tomonidan qilingan harakatlar NATO zimmasiga ma’suliyatni yuklaydi".
Unga ko‘ra, Human Rights Watch tashkiloti "Ozarbayjon Qorabog‘ mojarosi zonasida taqiqlangan qurollardan, xususan klasterli bombalardan foydalanayotganini qayd etdi, bu xalqaro huquqni qo‘pol ravishda buzmoqda".
"Va NATOga a’zo davlat ushbu jarayonda ishtirok etganda, NATOga a’zo mamlakat tog‘li Qorabog‘ga qarshi urush boshlash uchun mojaro zonasiga yollanma askarlar va terrorchilarni yuborganida, bu NATOning bevosita javobgarligi bildiradi va NATO bu savollarga javob berishi kerak", - dedi Pashinyan.
Armaniston va Ozarbayjon 30 yildan buyon hududiy nizolarni davom ettirayotgan Tog‘li Qorabog‘dagi janglar 27 sentyabrda boshlandi. Tomonlar bir-birini jangovar harakatlar va provokatsiyalarni boshlaganlikda ayblamoqda.
Boku va Yerevan ikki marta Moskva vositachiligi bilan sulh e’lon qildi, ammo har safar jangovar harakatlar qayta tiklandi. 25 oktabrda tomonlar uchinchi marta otashkesim e’lon qilindi, bu safar AQSh vositachiligi qildi. AQSh, Armaniston va Ozarbayjonning qo‘shma bayonotida aytilishicha, sulh bitimi 26 oktabr kuni Toshkent vaqti bilan soat 9:00 da kuchga kirdi.