Armaniston Bosh vaziri Nikol Pashinyanning rafiqasi Anna Akopyan Tog‘li Qorabog‘da "vatan chegaralarini himoya qilish" uchun ketayotganini ma’lum qildi. Bu haqda u o‘zining Facebook sahifasida yozib qoldirdi.
Siyosatchi rafiqasining so‘zlariga ko‘ra, u va yana 12 ayol yaqin bir necha kun ichida harbiy tayyorgarlikdan o‘tadilar, shundan so‘ng otryad Qorabog‘ga jo‘nab ketadi.
"Bir necha kundan keyin biz o‘z chegaralarimizni himoya qilish bilan yordamga kelamiz. Biz o‘z vatanimiz va qadr-qimmatimizni dushmanga topshirmasligimiz kerak", - deb yozgan u.
Bir necha hafta oldin Armaniston Bosh vaziri Nikol Pashinyanning yolg‘iz o‘g‘li Ashot Pashinyan ko‘ngillilar bilan birga Qorabog‘ mojaro zonasining oldingi chizig‘iga borgani haqida xabar berilgan edi.