Toshkent viloyati bojxona boshqarmasi “Bekobod” temir yo‘l chegara bojxona postida Davlat xavfsizlik xizmati Chegara qo‘shinlari harbiy xizmatchilari bilan hamkorlikda narkotik moddalarning noqonuniy olib o‘tilishining oldi olindi.
Qo‘shni davlatdan kirib kelgan yuk poyezdi vagonlarini ko‘zdan kechirish davomida yog‘ mahsulotlarini tashish uchun mo‘ljallangan sisterna g‘ildiragining ichki tomonidagi ko‘z ilg‘amas bo‘shlig‘iga 1 dona o‘ram mohirlik bilan yashirib qo‘yilganligi fosh bo‘ldi.
Mazkur o‘ram ochib ko‘rilganida esa, uning ichida 61,7 gr. og‘irlikdagi “marixuana” giyohvand moddasi borligi aniqlandi.
Hozirda mazkur holat yuzasidan bojxona organlari tomonidan surishtiruv harakatlari davom ettirilmoqda, deya xabar beryapti Davlat Bojxona qo‘mitasi rasmiy veb-sayti.