Prezident bugunning o‘zida Olmazor tumanidagi «ARDENT FOODS» mas’uliyati cheklangan jamiyat korxonasida bo‘ldi.

Bu shirkat bo‘sh turgan binolar negizida yangi sub’yektlar tashkil etish va ish o‘rinlari yaratishga qaratilgan siyosat samarasidir.

Loyiha qiymati 77 milliard so‘mdan ziyod bo‘lgan korxona ikkita liniyadan iborat. Birida yigirmaga yaqin qandolat mahsulotlari, ikkinchisida tez pishadigan ovqat ingrediyentlari ishlab chiqarilmoqda. 150 kishi ish bilan ta’minlangan.

Hozirda mahsulot Tojikiston va Afg‘onistonga eksport qilinadi. Yangi eksport bozorlarini ochib, joriy yil yakunida eksport hajmini 45 ming dollarga yetkazish rejalashtirilgan.

Mahsulotlar turini ko‘paytirib, qo‘shimcha ish o‘rinlari yaratish bo‘yicha ko‘rsatmalar berildi.