Joriy yilning 25 may kuni “Qamchiq” maxsus yong‘in qidiruv-qutqaruv boshqarmasiga “Toshkent-O‘sh” avtomobil yo‘lida harakatlangan “HOWO” rusumli yuk mashinasi yo‘l chetida to‘xtab turgan “Damas”ning orqa qismidan kelib, to‘qnashuv sodir etganligi to‘g‘risida xabar kelib tushgan.
FVV matbuot xizmatining ma’lum qilishicha, to‘qnashuv tufayli “Damas” avtomashinasi o‘zidan oldinda to‘xtab turgan “MAN” rusumli yuk mashinasiga urilgan.
Oqibatda “Damas” avtomashinasining haydovchisi Yu.N hamda ushbu avtoulovdagi yana ikki nafar fuqaro tan jarohati olgan.
YTHda jabrlangan fuqarolarni o‘z vaqtida qutqarib qolish uchun boshqarma tezkor navbatchi guruhi voqea joyiga zudlik bilan yetib bordi va qutqaruvchilar tomonidan ularga birinchi hamda psixologik yordamlar ko‘rsatilib, Pop tuman markaziy shifoxonasiga yetkazildi. Xodimlarining keskin vaziyatda qabul qilgan to‘g‘ri va tezkor choralari natijasida yuzaga kelishi mumkin bo‘lgan yana bir fojianing oldi olindi, deyiladi xabarda.