Qarshi shahriga tutash Qarshi tumaniga qarashli “Chaman” hududida turizm kompleksi qad rostlaydi. Bu haqda viloyat hokimi Zoyir Mirzayev bugun ushbu hududda mas’ullar ishtirokida o‘tkazilgan uchrashuvda ma’lum qildi.
“Milliyligimizdagi zamonaviylikni xalqaro standartlar bilan uyg‘unlashtirsak, turizm rivojiga katta hissa qo‘shgan bo‘lamiz, - dedi viloyat hokimi. - Hech bir ko‘rinish yoki bino bir-birini takrorlamasin. E’lon beringlar, tadbirkorlar o‘z loyiha va tashabbusini taqdim etsin”.
Turizm qo‘mitasini viloyat hududiy boshqarmasi bo‘lim boshlig‘i Sh.Xidirovaning ma’lum qilishicha, bu yerda 100 dan ortiq xizmat turlarini yaratilishi natijasida yaqin kelajakda mahalliy hamda xorijlik turistlar bilan gavjum manzilgohga aylanadi.
Majmuaning umumiy maydoni 9.95 ga. Loyiha 2021 yilning II choragida ishga tushirilishi rejalashtirilgan. “Chaman”da restoran, baliqchilar uchun joy, sport maydonchalari, bog‘, ochiq osmon ostidagi kinoteatr, golf maydoni, plyaj hamda cho‘milish havzasi (200 kishiga mo‘ljallangan) bunyod etiladi.
“Ro‘zimat G‘oyibovning dachasi”
Hozirda xarobazorga aylangan va sovetlar paytida qurilgan yakka bino (aniqrog‘i bino qoldig‘i) bir paytlar 1968 – 1983 yillarda Qashqadaryo viloyati partiya qo‘mitasining birinchi kotibi (hozirgi viloyat hokimi lavozimiga teng mansab – sof.uz) Ro‘zimat G‘oyibov dam oladigan va xordiq chiqaradigan maskan bo‘lgan. Mahalliy aholi bu yerni hali ham “G‘oyibovning dachasi” deb ataydi. G‘oyibov viloyatga rahbarlik qilgan davrda bu manzilda choyxona, baliqxona bo‘lgan.
Qashqadaryo gazetasining yozishicha, "dacha" ayni paytda "Viloyat kooperatsiya qurilish materiallari ta’minoti" MChJga qarashli bo‘lib, 2016 yilda kadastr hujjati qilingan. Hujjatlarga asosan bu yerda "Chaman" restorani tashkil qilinishi rejalashtirilgan.