Qirg‘izistonda maxsus xizmatlar Rossiya elchixonasining konsullik qismida bomba borligi haqida xabar bergan ayolni qo‘lga oldi. Bu haqda RIA Novosti mamlakatning Davlat milliy xavfsizlik qo‘mitasi (DMXQ) matbuot xizmatiga asoslanib xabar berdi.
Rossiya elchixonasida "bomba joylanganligi" haqidagi signal 6 mart kuni kelgan. Voqea joyiga kelgan mutaxassislar hududni ko‘zdan kechirib, diplomatik vakolatxona xodimlarini evakuatsiya qilgan, ammo hech narsa topa olmagan.
Shundan so‘ng ular noma’lum signal manbasini izlay boshlagan va bezorilik niyatida anonim xabarni 1974 yilda tug‘ilgan Qirg‘iziston fuqarosi yuborganligi aniqlangan.
Ayni paytda unga nisbatan terrorchilik akti to‘g‘risida yolg‘on xabar berganlik bo‘yicha jinoiy ish qo‘zg‘atilgan. Ayol 5 yilgacha qamoq jazosiga hukm qilinishi mumkin.