Hukumatning tegishli qaroriga ko‘ra, O‘zbekiston hududida yo‘l harakati qoidalarini buzgan xorijiy avtotransport vositalari haydovchilari yoki boshqa shaxslardan jarima undirishning yangi tartibi joriy etiladi.
Endilikda ushbu jarimalar xorijiy avtotransport vositalari O‘zbekistondan olib chiqib ketilayotganda bojxona organlari tomonidan undiriladi. Bunda ichki ishlar organlari «onlayn» rejimda taqdim etgan ma’lumotlar asos bo‘ladi.
Ushbu yangi tartib quyidagilarga tatbiq etilmaydi:
- - O‘zbekistonda akkreditatsiyadan o‘tgan xorijiy davlatlar diplomatik vakolatxonalari va konsullik muassasalarining, shuningdek, ularga tenglashtirilgan tashkilotlarning avtotransport vositalariga;
- - O‘zbekiston hududiga vaqtincha kirgan yoki tranzit harakatlanishda bo‘lgan xorijiy rasmiy delegatsiyalar avtotransport vositalariga.
Qaror bilan, O‘zbekistonda yo‘l harakati qoidalarini buzgan xorijiy avtotransport vositalari haydovchilaridan jarimalarni undirish tartibi to‘g‘risidagi nizom ham tasdiqlandi.