Qonunchilikda xodimning mehnat haqidan qanday hollarda ushlab qolinishi mumkinligi haqidagi savolga AOKAda o‘tkazilgan brifingda Adliya vazirligi axborot xizmati rahbari Sevara O‘rinboyeva javob berdi.
Ta’kidlanishicha, umumiy qoidalarga ko‘ra, xodimning yozma roziligi bilan, bunday rozilik berilmagan taqdirda sud qaroriga asosan mehnat haqidan ushlab qolish mumkin. Xodimlar roziligisiz mehnat haqidan quyidagi hollarda ushlab qolinishi mumkin:
- belgilangan soliqlar va boshqa majburiy to‘lovlarni undirish;
- sud qarorlari va boshqa hujjatlarni ijro etish;
- oldindan berilgan maqsadli pullar bo‘yicha hisob-kitob qilish hamda ortiqcha to‘langan summani qaytarib olish;
- mehnat ta’tili bo‘yicha hisob-kitob qilish;
- xodim tomonidan ish beruvchiga yetkazilgan zararni qoplash;
- intizomiy jazo tariqasida tayinlangan jarimani undirish uchun.
Ma’lum qilinishicha, ish haqidan ushlab qolinadigan haqning umumiy miqdori xodim ish haqining 50 foizidan ortib ketmasligi kerak. Ushbu cheklov aliment majburiyatlari bo‘yicha qarzdorlikning axloq tuzatish ishlari tarzidagi jazo tayinlangan xodimni ish haqidan ushlab qolishga nisbatan talqin etilmaydi. Bunday hollarda ushlab qolinadigan haqning miqdori 70 foizdan oshib ketmasligi lozim.