Avval xabar berganimizdek, O‘zbekiston Respublikasi ta’lim muassasalariga muassasalariga o‘qishga qabul qilish bo‘yicha Davlat komissiyasining 2020 yil 4 fevraldagi 12-son bayoni bilan qo‘shni davlatlar OTMlarida tahsil olayotgan O‘zbekiston Respublikasi fuqarolariga o‘qishini respublika OTMlariga ko‘chirish bo‘yicha ariza topshirish imkoniyati berilgan edi.
Oliy va o‘rta maxsus ta’lim vazirligining murojaatlar uchun ishga tushirilgan @zamonaviytalim_bot manziliga eng ko‘p Qozog‘iston, Qirg‘iziston va Tojikiston OTMlaridan o‘qishni O‘zbekistonga ko‘chirish bilan bog‘liq savollar kelib tushmoqda. Vazirlik eng ko‘p berilayotgan savollarga navbatdagi javoblarni e’lon qildi.
Ko‘chirish bo‘yicha ariza topshirdim, natijasi qachon e’lon qilinadi?
Oliy va o‘rta maxsus ta’lim vazirligi tomonidan respublika bo‘ylab tashkil etilgan Hududiy ishchi guruhlar tomonidan arizalar umumlashtirib boriladi. Murojaatlar soni ko‘pligini inobatga olgan holda, hujjat qabul qilish shu yilning 15 martiga qadar uzaytirildi.
Fuqarolar tomonidan 2020 yil 15 fevralgacha topshirilgan hujjatlar, 2020 yil 25 fevraliga qadar umumlashtirilib, tegishli qaror qabul qilish uchun Davlat komissiyasiga taqdim etiladi.
Joriy yil 15 martga qadar topshirilgan hujjatlar ham shu tartibda ko‘rib chiqiladi.
O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasining bayoni bilan oliy ta’lim muassasalariga talabalikka qabul qilish uchun tavsiya qilinadi.
Natijalar bilan vazirlikning rasmiy veb-sayti, ijtimoiy tarmoqlardagi sahifalari, qolaversa, Hududiy ishchi guruhlar orqali tanishish mumkin bo‘ladi.
Akademik qarzdor talabalarga o‘qishni ko‘chirishga ruxsat beriladimi?
Oliy ta’lim muassasalari talabalari o‘qishini ko‘chirish, qayta tiklash va o‘qishdan chetlashtirish tartibi to‘g‘risida Nizomga ko‘ra, bu holatda talaba akademik qarzdor sifatida o‘qishga qabul qilinadi, ya’ni o‘qishni ko‘chirishga ruxsat beriladi.
Talaba qaysi OTMga o‘qishini ko‘chirgan bo‘lsa, o‘sha OTMda joriy semestr davomida akademik qarzdorlikni bartaraf etishi mumkin.
Kunduzgi ta’limga o‘qishga ko‘chirish mumkinmi?
Mumkin. Bunda Hududiy ishchi guruh tomonidan talabgorning tahsil olayotgan ta’lim yo‘nalishidan kelib chiqqan holda, respublikadagi OTMlar quvvati ko‘rib chiqiladi. Agar xorijda talaba tahsil oladigan ta’lim yo‘nalishi bo‘yicha mahalliy OTMda bo‘sh joy bo‘lmagan taqdirda, kechki va sirtqi ta’lim shakllari tavsiya qilinadi.
Eslatma: Qozog‘iston, Qirg‘iziston va Tojikiston oliy ta’lim muassasalaridan o‘qishini O‘zbekistonga ko‘chirish ixtiyoriy bo‘lib, Hududiy ishchi guruhlar tomonidan respublika OTMlari quvvati va imkoniyatidan kelib chiqib ta’lim shakli va yo‘nalishi taklif qilinadi.
Yakuniy qarorni talaba va uning ota-onasi qabul qiladi.
Mavzuga doir: Qo‘shni davlatlardan o‘qishni ko‘chirish: eng ko‘p berilayotgan savollarga javoblar
Oliy va o‘rta maxsus ta’lim vazirligi qo‘shni davlatlardagi oliy ta’lim muassasalaridan o‘qishini ko‘chirish bo‘yicha murojaat qilayotgan fuqarolar va ularning ota-onalariga murojaat qilib, Hududiy ishchi guruhlarga fuqarolar tomonidan qalbaki (soxta, yasama) hujjatlar topshirilayotganini ma’lum qildi.
O‘qishini qo‘shni davlatlardagi oliy ta’lim muassasalaridan ko‘chirish to‘g‘risida ariza topshirgan fuqarolarning hujjatlari to‘liq tekshiriladi va qalbaki hujjatlar aniqlangan taqdirda talabalikka qabul qilinmaydi hamda hujjatlar huquqni muhofaza qiluvchi idoralarga taqdim etiladi.